هتطلع هتنزل

يا شاطر يا جابر خواطر
يا ساكن مقابر وصابر وعال
يا واكل سمومك يا بايع هدومك
يا حامل همومك وشايل جبال
يا شعبي اللي نايم وسارح وهايم
وفي الفقر عايم وحاله ده حال
مدروخ وآخر انسطال
أحبك محشش مفرفش مطنش ودايخ
أمورك كده باتكال
أحبك مكبر دماغك مخدر ممشي
وأحب اللي ينهب ويسرق تلال
وأحب اللي ينصب وأحب اللي يكدب
وبالع لسانه وكاتم ما قال
وأحب اللي شايف وعارف وخايف
وأحب البهايم وأحب البغال
وأحب اللي قافل عيونه المغفل
وأحب اللي عايز يربي العيال
وأحب اللي راضي وأحب اللي فاضي
وأحب اللي محبط وشايف محال
وأحب اللي يائس وأحب اللي بائس


وأحبك تسافر وتبعد تهاجر
وتبعت فلوسك دولار أو ريال
وأحبك تطبل تهلل تهبل
عشان ماتش كورة وفيلم ومقال
وأحبك تأيد تعظم تمجد توافق تنافق وتلحس نعال
تحضر نشادر تجمع كوادر تلمع تقمع تضبط مجال
لكن لو تفكر تخطط تقرر تقرر تشغللي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللي روحك مفرد رجال
ساعتها هجيبك….لا يمكن أسيبك وراح تبقى عبرة وتصبح مثال
هبهدل جنابك وأذل اللي جابك وهيكون عذابك ده فوق الإحتمال
وامرمط سعادتك وأهزأ سيادتك واخللي كرامتك في حالة هزال
وتلبس قضية وتصبح رزية وباقي خياتك تعيش في انعزال
.. هتقبل هحبك… هترفض هلبك هتقبل هحبك هتطلع هتنزل هجبلك جمال